Þann 23. apríl næstkomandi verður dans og tónleikaverkið Skrattinn úr Sauðarleggnum frumsýnt í Kassanum Þjóðleikhúsinu.

Skrattinn úr Sauðarleggnum er dans og tónleikaverk þar sem forn kveðskapur og íslensk menning er sameinuð samtímadansi og dægurtónlist. Þrír sviðslistamenn skoða eðli og uppyggingu bragarhátta, snúa þeim á hvolf með dansi og leysa loks kveðskapinn af hólmi. Gullfoss og Gleðibankinn, Hárkollur og Hávamál, Vikivakar og vögguvísur sameinast í þessu óútreiknanlega sviðsverki. Útkoman er íslenskur rímnakabarett þar sem hið hefðbundna verður það frábrugðna, gamla Ísland hittir nýja Ísland.

Skrattinn úr Sauðarleggnum er samstarf tveggja danshöfunda og tónlistarmanns, Melkorku Sigríðar Magnúsdóttur, Sigríðar Soffíu Níelsdóttur og Valdimars Jóhannssonar. Hópurinn vann fyrst saman að verkinu Glymskrattinn sem sýnt var á Listahátíð í Þjóðleikhúskjallaranum 2012 og hlaut lofsamlega dóma gagnrýnenda. Þau hafa öll komið víða við og meðal annars unnið með dansflokki Ernu Ómarsdóttur Shalala, Íslenska Dansflokknum, og hljómsveitinni Reykjavík! ásamt því að vinna að margvíslegum verkefnum innan danslistarinnar hér heima og erlendis. Að Skrattanum úr Sauðarleggnum koma jafnframt Brynja Björnsdóttir leikmyndahönnuður og Agnieszka Baranowska búningahönnuður. Plakat: Ljósmyndari Marino Thorlacius Grafík: Magnús Leifsson.

Sýningin er styrkt af Reykjavíkurborg, Evrópu Unga Fólksins og Mennta- og Menningarmálaráðuneytinu og er unnið í samvinnu við Þjóðleikhúsið.

miðasala á midi.is og leikhus.is

Skrattinn úr Sauðarleggnum verður sýndur fjórum sinnum í Kassanum Þjóðleikhúsinu. Sýningardagar eru eftirfarandi:

Miðvikudagur 23. apríl Frumsýning Fimmtudagur 24. apríl 2. sýning Laugardagur 26. apríl 3. sýning Sunnudagur 27. apríl 4. sýning ATH aðeins þessar sýningar